Movimientu pola Estinción Voluntaria de la Humanidá

VHEMT

“Que podamos vivir enforma y desapaecer”


La extinción progresiva de la especie humana mediante’l cese voluntariu de la reproducción va permitir a la biosfera terrestre recuperar el so antiguu esplendor. La falta d’espaciu vital y la escasez de recursos van resolvese a midida que nos reduzamos.


Aragonés | Asturian | Belarusian | Català | Chinese | Corsu | Czech | Dansk | Deutsch | English | Español | Esperanto | Français | Hebrew | Ido | Interlingua | Interlingue | Italiano | Latin | Lingua Franca Nova | Nederlands | Norsk | Occitan | Polski | Português | Romanian | Russian | Slovensky | Suomi | Svenska | Turkish | Universalglot | Volapük

El Movimientu pola Estinción Voluntaria de la Humanidá ye un movimientu, nun una organización. Ye un movimientu social creáu por persones que se preocupen pola vida no planeta Tierra. Nun somos un puñáu de misántropos e malthusianos antisociales y inadaptaos que se complacen morbosamente cada vez que les catástrofes azoten a la humanidá. Nada más lloñe de la verdá. La estinción voluntaria de la humanidá ye una alternativa humanitaria a les catástrofes humanes.

Nun queremos falar sobre la manera como la especie humana tien demostráu ser un parásitu egoísta ya inmoral sobre la faz d’esti planeta antiguamente sanu. Esi tipu de negatividá nun ofrez nenguna solución a los horrores inexorables provocaos pola aición humana. En vez d’eso, el movimientu presenta una alternativa reconfortante a la esplotación devastadora y a la destrucción masiva de la ecoloxía terrestre.

Como saben los Voluntarios del movimientu, la esperanzadora alternativa a la desapaición de millones d’especies vexetales y animales ye la estinción d’una sola: l’Homo sapiens… ye dicir, nós.

Cada vez que daquién decide nun añader más seres humanos a los que yá s’amontonen nesti deterioráu planeta, un nuevu rayu d’esperanza brilla na tiniebla. Cuando tol mundu decida dexar de procrear, la biosfera terrestre recuperará’l so antiguu esplendor y el restu de criatures serán llibres de vivir, morrer, evolucionar (si ye que creyen na evolución), y quiciabes desapaezan, como tantos “experimentos” de la naturaleza fixeron a traviés de los tiempos.

Toos tenemos que collaborar.

visualize

Dibuxu de Nina Paley

¿Faláis en seriu?

Munchos ven humor no movimientu y creen que nun podemos falar en seriu sobre la estinción voluntaria de la humanidá. Pero anque tantu la situación como’l movimientu sían coses series, tamién hai llugar pa l’humor. De fechu, ensin humor, la situación de la Tierra sería insoportablemente deprimente. Un poco de frivolidá quíta-y fierro a la situación.

Ye cierto que la rápida estinción de la vida salvaxe y la muerte diaria de miles de neños nun son coses gracioses, pero nin la risa nin el llantu van poder cambiar lo qu’ocurre. ¿Por qué nun divertinos mientres trabayamos e xugamos por un mundu meyor?

Per otra parte, devolver a la Tierra al so antiguu esplendor y poner fin al sufrimientu innecesariu de la humanidá son idees positives. Nun tien sentíu dexase abatir.

¿Los Voluntarios esperen tener ésitu nel so intentu?

Los Voluntarios del Movimientu somos realistes. Sabemos que nunca nun vamos ver el día no que yá nun haya seres humanos sobre’l planeta. El nuesu ye un oxetivu a mui llargu plazu. Hai quien tien suxeríu que sólo esisten dos probabilidaes de que tol mundu decida voluntariamente dexar de reproducise: poca y nenguna. Les perspectives paecen contraries a la preservación de la vida terrestre, pero la decisión de dexar de reproducise sigue siendo la más xusta dende un puntu de vista éticu. De fechu, la posibilidá de que fracasemos en evitar la masacre qu’está maquinandu la humanidá ye una buena razón pa nun condergar a la vida a naide más.

Inclusive si les nueses probabilidaes de tener ésitu fueren d’una ente cien, tendríamos d’intentalo. Nun podemos abandonar y dexar que la humanidá siga’l so camín. Ye munchu lo qu’hay en xuegu.

El Movimientu puede considerase un ésitu cada vez que daquién decide voluntariamente dexar de reproducise.

¿El Movimientu tien enemigos a combatir?

Dempués de ver cientos de series de televisión nas qu’el bonu acaba col malu, ye tentador mirar el mundu real cola mesma mentalidá heroica de pacotilla. Podemos buscar un enemigu a atacar pa defender la nuesa xusta causa, pero en realidá nun hai nengún malu nesta historia. En definitiva, los verdaderos “enemigos” son la voracidá, la inorancia y la opresión humanes. Podemos consiguir más promoviendo la xenerosidá, el conocimientu y la llibertá que lluchando contra un enemigu ficticiu.

Van faese grandes progresos hacia la meyora de la calidá de la vida terrestre oponiendo la responsabilidá a la voracidá, la educación a la inorancia y la llibertá a la opresión. En cuenta de citanos na calle colos malos al mediodía y enguedeyanos a tiros como nas películes del oeste, ¿por qué nun convidalos al chigre pa buscar soluciones xuntos?

¿Cuál ye la postura oficial del Movimientu?

Como’l Movimientu nun ye un ser vivu que tenga cerebro nin boca, tampoco puede tomar decisiones nin tener opiniones. Nun puede participar n’alderiques, dicir a la xente lo que tien que facer o pensar, nin llevar un puñetazu por ello.

La estinción voluntaria de la humanidá ye sólo una idea a añader a los actuales sistemes de creyencies, y nun un complexu códigu de conducta qu’haya que siguir. Nun hai nengún comité de mandamases que decida cuál ye la postura que tien qu’adoptar caún.

La mayoría de Voluntarios del Movimientu aprueben la filosofía espresada pol lema “Que podamos vivir enforma y desapaecer”, pero si daquién nun quier vivir enforma, ye asuntu suyu. En realidá, la única esixencia pa facese Voluntariu ye nun añader más seres humanos a la población.

Los Voluntarios son tan diversos en cuanto a los sos puntos de vista en materia de relixón, política y filosofía que ponese a formular postures oficiales del Movimientu introduciría un elementu de división. Guardaivos de los dogmes. Caúno fala por sigo mesmu.

¿Cuándo y cómo entamó’l Movimientu?

Les raíces del Movimientu son tan profundes como la historia humana. El potencial pa un movimientu pola estinción de la humanidá tien estáu ehí desque esiste’l ser humanu.

Cuando los homes de la Era Glacial cazaben animales hasta la extinción, ye posible que polo menos unu de los nuesos ancestros razonara con desconciertu.

A midida qu’el Creciente Fértil se convertía n’áridu desiertu y los cedros del Líbanu yeren sacrificaos pa construyir templos, daquién debió pensar “Esto nun me gusta nada”.

Cuando los romanos aprovisionaben el so imperiu estrayyendo recursos de zones próximes y llonxanes, seguro que daquién esclamó “Humanus non gratis”, o daqué pol estilu.

A daquién debió ocurríse-y que’l planeta estaría meyor ensin aquella horda entrometida. Ye dicir, daquién aparte del dios mesoriental Yavé/Alá. Cuenta la tradición que, na época prehistórica, aquel dios creador decatóse del error de tener fechu al home e dispúnxose a faelo desapaecer de la tierra, pero nun momentu de debilidá salvó a una familia con fíos. ¡Ai! (Xénesis 6:5-8).

Nós llamámoslu Movimientu pola Estinción Voluntaria de la Humanidá, pero ensin dulda tuvo otros nomes no pasáu. Polo que sabemos, nengún d’esos nomes foi rexistráu.

Debe haber miles, si nun millones de persones no mundu, que lleguen de manera independiente a la mesma conclusión. Una gran parte de los Voluntarios actuales yeren estincionistes convencíos antes d’oyer falar del Movimientu.

El verdaderu orixe del Movimientu puede atopase na bayura natural d’amor y de llóxica qu’hai en caún de nós. El nuesu sentíu innatu de la xusticia llévanos a tomar la decisión más responsable.

¿Quién ye’l fundador?

Naide ye’l fundador del Movimientu. Les U. Knight, un activista d’Estaos Xuníos, dio’l nome de Movimientu pola Estinción Voluntaria de la Humanidá a una filosofía o conceición del mundu que tien esistíu desque’l ser humanu entamó a pensar. Trátase d’una conocencia a la que se llegó de manera independiente en dellos llugares del mundu a lo llargo de la historia, pero que se perdió en mediu’l pronatalismo de la sociedá.

Como millones de persones, Les U. Knight siguió una simple secuencia llóxica y, lleváu polo amor, llegó a la conclusión de que la Tierra taría munchu meyor ensin el ser humano. Podría ser consideráu como un descubridor que identificó’l movimientu y que-y dio nome, magar que caúno alcontra la verdá por sigo mesmu.

Anque Les sía conocíu internacionalmente como voceru del Movimientu, naide puede falar en nome de tolos Voluntarios. Nun hai nenguna postura oficial sobre cuestiones que vaigan más allá de lo que puede deducise polo nome del Movimientu.

Tenemos fíos. ¿Aínda podemos xuninos?

Claro que sí. Nun seréis los únicos. Cuando les persones adopten la perspeutiva del estincionismu voluntariu, deciden nun añader más membros a l’actual familia humana. Nun presionen a los sos fíos pa que-yos dean nietos y hasta pueden anima-yos a tomar una decisión responsable sobre la so fertilidá.

Los neños de güei son el destín del mañana. Los nuesos neños tienen el potencial pa algamar la conocencia necesaria pa cambiar el rumbu de la civilización y entamar a recuperar la biosfera terrestre. La mayoría d’ellos pueden aprovechar la nuesa ayuda pa desenvolver tol so potencial.

Nun hai nenguna razón pa sentise culpable polo pasáu. La culpabilidá nun lleva a soluciones positives. Ser parte del Movimientu nun tien nada que ver col pasáu. Ye’l futuru de la vida terrestre lo que los Voluntarios quieren preservar.

¿Hai daquién que s’oponga al Movimientu?

A primera vista, dalgunos creen que los Voluntarios y Simpatizantes del Movimientu debemos odiar a la xente y querer que tol mundu se suicide o sía víctima d’asesinatos masivos. Ye fácil escaecer qu’otra manera de reducir el númberu de seres humanos ye simplemente dexar de reproducinos. Tener fíos paez ser un puntu ciegu na nuesa perspeutiva de vida.

La idea de que toos podamos abstenenos voluntariamente de procrear suel escartase ensin muncha consideranza. Por exemplu:
• “La xente siempres va tener rellaciones sexuales, eso nun puede evitase”;
• “Reproducise ye un instintu humanu”;
• “Encántenme los neños”;
• “Dalgunos tenemos que reproducinos porque somos meyores que los demás”;
• “L’home forma parte de la Naturaleza”.
• … etcétera.

Sicasí, si daquién reflexona bastante y fai’l esfuerciu de dir más allá de les idees socialmente inculcaes qu’impiden pensar con claridá, podrá llegar prácticamente a la mesma conclusión: tenemos que desapaecer voluntaria y progresivamente polo bien de la humanidá y del planeta.

Naturalmente, el Movimientu ye contrariu a la estinción involuntaria de cualquier especie, asina comu a cualquier iniciativa que defienda’l esterminiu de la humanidá. Na actualidá llévense a cabu actividaes organizaes en favor d’estos dos horrores. Por exemplu:
• producción y usu d’armes;
• producción de tóxicos, como petroquímicos y sustancies nucleares;
• esplotación de recursos humanos y naturales;
• promoción del fascismu reproductivu;
• … etcétera.

Lo de riba podría llamase Movimientu Terrorista polo Esterminiu de la Humanidá, pero eso sería etiquetar y promover una actitú de rivalidá.

El Movimientu ye contrariu a lo que fai esta xente, pero ye pocu probable que daquién se tome la molestia de devolver el favor. En realidá nun tien munchu sentíu oponese a un movemientu voluntariu que nun fai dañu a naide y beneficia a tol mundu.

¿Cómo puedo xunime al Movimientu?

Ser parte del Movimientu significa compartir la nuesa manera de pensar. Tou lo que tienes que facer pa xunite ye optar por nun reproducite d’equí p’arriba. Pa dalgunos, ésta ye una decisión fácil de tomar. Pa otros ye una cuestión irrelevante. Pero pa munchos, xunise al Movimientu supón facer un enorme sacrificiu personal.

El Movimientu nun ye una organización, polo que nun hai que pagar nenguna cuota de sociu. Somos millones de persones, caúna faciendo de manera independiente lo que consideramos que ye lo más correutu.


Creative Commons License
Les U. Knight

A nun ser que s’indique lo contrariu, los conteníos d’este sitiu tan disponibles baxo
Licencia Creative Commons Reconocimientu 3.0 Estaos Xuníos..
Atibuya copias a vhemt.org.